Plantun de Prouvènço

Pèr coumpara dos planto d'encò nostre

Carduus nigrescens subsp. nigrescens & Picea abies

Carduus nigrescens subsp. nigrescens

Asteraceae Compositae

Nom en français : Chardon noirâtre.

Descripcioun :
Lou cardoun-negrous es uno planto coumuno dins quàsi tóuti li relarg de Prouvènço, aleva lis àuti mountagno. Li flour coumpausado soun soulitàri e pourtado sus de long pecou, dre e souvènt clina (mai pas tant que lou cardoun-clina). Se recouneis à si bratèio torso à la baso pièi plato, pounchudo emé lou dessubre bèn vioulet. La subsp. nigrescens, presentado eici, se recounèis à si bratèio di proun rebatudo, larjo (1,5 à 2 mm) e pu courto (< 9 mm).

Usanço :
Li tijo dèvon èstre manjadisso emai n'en sachèn pas mai. Escriéure au site s'avès d'entresigne.

Port : Grando erbo
Taio : 30 à 200 cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Carduus
Famiho : Asteraceae
Famiho classico : Compositae
Tribu : Cardueae
Ordre : Asterales

Coulour de la flour : Vióuleto
Petalo : >6
Ø (o loungour) enflourejado : 18 à 25 mm
Flourido : Printèms - Estiéu

Sòu : Ca (Si)
Autour basso e auto : 0 à 1700 m
Aparado : Noun
Remarco : Endemico de Prouvènço
Abriéu à Juliet

Liò : Tepiero seco - Camin
Estànci : Mountagnard
Couroulougi : Estenoumediterrano-Ouèst
Ref. sc. : Carduus nigrescens subsp. nigrescens Vill., 1779

Serento

Picea abies

Pinaceae

Àutri noum : Serénta, Sarento, Sourento, Serinte, Sùfi.

Noms en français : Epicéa, Épicéa commun.

Descripcioun :
Pèr pas s'engana emé lou sapin fau regarda coume soun lis aguio o peréu li pigno (o vacheto). Li fueio de la serento soun estacado tout à l'entour de la ramo coume uno brosso, au contro de li dóu sap que soun tóuti dins lou meme plan coume un penche. De nouta pamens qu'acò marcho pas pèr d'ùni sap fourestié (coume Abies pinsapo). Li pigno pendoulon, alor qu'encò dóu sap, quouro li poudès vèire, se tènon bèn drecho.

Usanço :
I'a touto meno d'utilisacioun dóu bos segound sa qualita. La pegoulo (resino) èi di proun vulneràri. Foundudo, servié, à passa tèms, pèr sougna li tigno (J.-R. Fortoul). Li jóuini fueio soun manjadisso (ensalado, pèis), an lou goust de citroun.